2026ko martxoaren 15ean, Elgeta herriak Ibiltarien Jaiaren edizio berri bat hartuko du. Jardunaldi hau Euskal Herriko Iraupen Luzeko Ibilaldien Zirkuituaren (Zirkuitua) barruan kokatzen da, eta Euskal Mendizale Federazioaren jarduera-egutegiaren parte da.
Ibilaldia 8:00etan abiatuko da Elgetako kiroldegitik, eta 20 kilometroko ibilbide zirkularra eskainiko du, 1.200 metroko desnibel positiboarekin. Ibilbidean zehar inguruko gune esanguratsuak zeharkatuko dira —Asentzio, Intxorta, Erdella, Aixola eta Egoarbitza—, irteera puntura berriro itzultzeko. Ibilbidea zorrotza baina irisgarria da, paisaiaz eta jardunaldi honen izaera kolektiboaz gozatzeko pentsatua.
Izen-ematea www.zirkuitua.com webgunean egin ahal izango da otsailaren 23tik martxoaren 13ra, eta, horrez gain, ibilaldiaren egunean bertan izena emateko aukera ere egongo da. Ibilaldia amaitzean, parte-hartzaileek dutxa zerbitzua izango dute kiroldegian, eta antolakuntzak gela bat prestatuko du koltxonetekin bezperan bertan lo egin nahi dutenentzat (Zerbitzu hau erabili nahi dutenek, mesedez antolakuntzari jakinarazi telefonoz edo e-mailez).
14:30etik aurrera, bazkaria egingo da Elgetako kiroldegian. Bazkarirako izen-ematea Elgetako Udalaren bidez egin beharko da (943 768 022 / [email protected] / www.elgeta.eus, otsailaren 23tik martxoaren 10era bitartean. Menuaren prezioa 30 eurokoa izango da.
Jardunaldiaren barruan, aurreko edizioko iraupen luzeko ibilaldien Zirkuituko finalistei diplomak banatuko zaizkie, zirkuituaren antolakuntzak ezarritako irizpideen arabera (gutxienez 8 ibilaldi osatzea, lurralde bakoitzean bana eta egutegiko beste 3 aukerakoak). Era berean, Shebe Peña Saria ere banatuko da, eta aurtengo edizioan Moises Andres Zubiriari emango zaio (Andatza Mendi Taldea – Usurbil).
2026ko iraupen luzeko ibilaldien Zirkuituaren egutegiari dagokionez, aurreko edizioetako egiturari eusten dio, Euskal Herriko lurralde desberdinetan urte osoan zehar banatutako probekin. Egutegiaren xehetasun guztiak Zirkuituaren webgunean kontsulta daitezke: www.zirkuitua.com
Lehen hitzordua martxoaren 29an izango da, 57. Aizkardiko Ibilaldiarekin. Ibilaldi horrek bi ibilbide aukera eskainiko ditu: 43 kilometrokoa batetik, eta 24 kilometroko beste aukera laburragoa bestetik. Azken irteera azaroaren 1ean egingo da, XL Gorobel Ibilaldiarekin. Guztira, 24 ibilaldi aurreikusi dira datorren urterako.
