EMFk 2027-2028ko Alpinismo Teknifikazio Taldean parte hartzeko deialdia ireki du

EMFk 2027-2028ko Alpinismo Teknifikazio Taldea osatzeko hautaketa prozesua ireki du. Ekimenaren helburua alpinista gazteen kirol garapena bultzatzea eta mendian segurtasunez, irizpidez eta autonomiaz aurrera egiteko tresnak eskaintzea da.

«Harrobia sortzen, alpinistak sortzen» lelopean, programak prestakuntza teknikoa eta mendizaletasunaren balioak uztartuko ditu: laguntasuna, elkartasuna, mendiarekiko errespetua eta talde lana. Taldekide bakoitzak bere gaitasunetara eta sokakideen gaitasunetara egokitutako jarduerak aukeratzen ikastea da helburua, mendiko baldintzak eta arriskuak kontuan hartuta.

Hautagaitza aurkezteko baldintzak

Deialdia gutxienez 18 urte dituzten eta EMFko Pirinioak edo Mundua modalitateko federazio lizentzia duten pertsonei zuzenduta dago. Hautagaiek sasoi fisiko ona eta goi mendiko izotz, misto, eski eta harkaitzeko ibilbideetan sokaburu gisa aritzeko esperientzia izan beharko dute.

Era berean, neguko mendian segurtasunez moldatzeko gaitasuna, motibazioa, taldean aritzeko jarrera eta parte hartzeko konpromisoa eskatuko dira.

Ez dago hautagaitza aurkezteko gehieneko adinik, baina hautagaien gaztetasuna baloratuko da. Aurreko edizioetan teknifikazio taldeko kide izan direnek ezin izango dute parte hartu.

Eskaerak, abenduaren 6ra arte

Interesa dutenek jarraian eransten dugun formularioa bete beharko dute. Bidaltzeko epea:  2026ko abenduaren 6a barne.

Honako dokumentu eta datu hauek aurkeztu beharko dira:

• Kirol curriculum osoa.
• Izen-abizenak, kluba, posta helbidea, telefonoa eta helbide elektronikoa.
• EMFko federazio txartelaren kopia.
• Jarduera egiteko eragozpenik ez dagoela adierazten duen mediku ziurtagiria.

Hautaketa probak, urtarrilean

Curriculumak baloratu ondoren, 15 hautagai deituko dituzte hautaketa probetara. Probak 2027ko urtarrilaren 29an, 30ean eta 31n egitea aurreikusi da, Tena haranean edo inguruko eremuetan. Kokapen zehatza aurrerago zehaztuko da.

Mendiko eskian, elur eta izotzetako progresioan, izotz eskaladan eta harkaitz eskaladan —kirol eskaladan zein norberak babesak jarriz egindako eskaladan— dituzten gaitasunak ebaluatuko dira. Teknika, segurtasuna eta materialaren erabilera baloratuko dira.

Probak ez dira banaka baztertzaileak izango. Hautaketa egiteko, kirol curriculuma, proba teknikoak eta elkarrizketa pertsonala batera baloratuko dira. Elkarrizketak beste irizpide tekniko batzuek baino pisu handiagoa izango du. Halaber, emakumeen eta gizonen arteko parekidetasuna kontuan hartuko da.

Hautatutako sei kirolariek osatuko dute 2027-2028ko Alpinismo Teknifikazio Taldea. Behin betiko hautaketa 2027ko otsailaren lehen astean jakinarazi eta argitaratuko da.

Kontsultatu deialdi osoa baldintzak, aurkeztu beharreko dokumentazioa eta proben xehetasunak ezagutzeko.