Asteburu honetan Euskal Mendizale Federazioa (EMF-FVM) hiru korrikalarik ordezkatu dute Madeira Skyrace 2024an, Merrel Skyrunner World Series lasterketako zazpigarren proban. Zentzu horretan, Ioseba Eskudero, Aitor Zunzunegi eta Lide Urrestarazu Santanara joan ziren skyrunningeko atleta eta zale onenak erakartzen dituen nazioarteko panoraman probarik desafiatzaileenetako batean lehiatzeko.
Ioseba Eskuderok egin zuen saiorik aipagarriena, gizonezkoen kategorian 5. sailkatua izanik, 5:24:33an probaren ia 45 kilometro eta 3.500 metroko desnibel positiboa eginez. Aurreikuspenak bete zituen, une oro lasterketaren buruan mantenduz.
Bestalde, Aitor Zunzunegiren papera nabarmendu behar da, 12. postuan amaitu baitzuen, 6:06:58 denboran burutuz. Aitzitik, zorteak ez zion lagundu Lide Urrestarazuri, zeinak orkatila bihurritu zuen 15. kilometroaren inguruan, eta lasterketa utzi behar izan zuen.
Madeira Skyrunner World Series
MSR Merrel Skyrunner World Series zirkuituaren parte da, eta hitzordu ikusgarrienetako bat da. Irteera lerroa skyrunner onenez beteta zegoen, eta, beraz, itxura zuen lasterketa zirraragarria eta ustekabekoa izango zela. Hala ere, eguraldia ez zen batere ona izan, hezetasun eta laino asko zegoen, txirimiri eta guzti.
Korrikalari frantzesak Lucille Germain eta Loic Robert izan ziren txapeldunak. Oihana Kortazar (Salomon taldea) euskal atletak ere lasterketa bikaina egin zuen, bigarren postuan amaituz, Germainengandik 18 minutura.
Skyrace Du Mercantour
Igande honetan, ekainaren 23an, Euskal Selekzioak bere hurrengo lasterketan parte hartuko du: Skyrace Du Mercantour Cote d´Azurren. Lasterketa horrek, 2. mailakoa izendatuta dago, puntuen eta postuen erdia ematen die parte hartzaileei Skymasters final handirako. Atletek 30 kilometroko ibilbidea eta 2.100 metroko desnibel positiboa gainditu beharko dute, 5 kilometroko eta 500 metroko igoerarekin hasita La Colmianeraino.
Lasterketa honetarako Euskal Selekzioak 6 korrikalari deitu ditu: Ibai Cebrian (sub 23), Anartz Artola, Oier Zubeldia, Larraitz Etxebeste, Ainhoa Intxausti eta Asier Azkarate.
