2026ko Zegama-Aizkorri lasterketak berriz ere berretsi du probak bizi duen hazkunde unea, nazioarteko panoraman mendiko lasterketarik indartsuenetako bat bihurtuz.
Aurreko egunetan elurra egin zuen arren eta eguraldi txarraren mehatxua egon arren, azkenean baldintzak onak izan ziren eta lasterketa baldintza bikainetan jokatu zen, bai korrikalarientzat bai ikusleentzat. Goizetik bertatik, ibilbideko gune nagusiak —eta beste hainbat ere— jendez gainezka egon ziren, Zegamaren irudi bereizgarri hori sortuz: mendia, kirola eta zaletasuna bat eginda.
Kirol arloan, maila berriz ere oso altua izan zen, helmugan denbora bikainak lortuta eta parte-hartze maila handiarekin. Gure korrikalarien artean, askok emaitza nabarmenak lortu zituzten, eta gero eta agerikoagoa den joera bat berretsi zen: euskaldunen presentzia top 20ko postu lehiakorretan ohiko bilakatzen ari da. Era berean, gero eta gehiago dira lau ordutik behera sartzea lortzen dutenak; edizio honetan, hamabi korrikalarik lortu zuten.
Garaipena Elhousine Elazzaouirentzat izan zen, 3:45:07ko denborarekin. Aitor Ajuria izan zen lehen euskal korrikalaria helmugan, bederatzigarren postuan sailkatuta (3:57:56), top 10ean sartzea lortuz. Lasterketa oso sendoa egin zuen, ibilbide osoan zehar esfortzua kudeatzeko heldutasun handia erakutsiz.
Paul Ormaetxeak 16. postu bikaina eskuratu zuen (4:01:58), eta Oier Zubeldia 19. izan zen, 4:04:04ko denborarekin. Anartz Artolaren kasuan, 21. postua (4:06:07) bereziki aipagarria da; izan ere, orain arte distantzia motzagoetan aritu da lesio luze bati aurre egitetik datorrelako eta. Baina aski garbi utzi digu distantzia honetan ere lehiatzeko bikain dagoela. Hodei Samaniego 40. izan zen (4:17:37) eta Aitor Zunzunegi 67. postuan sailkatu zen (4:30:55).
Emakumezkoen kategorian ere ikuskizun handia izan zen. Irabazleak, Tove Alexanderssonek, gainera, errekor berria ezarri zuen 4:08:09ko denborarekin, aparteko jarduna eginez. Nabarmendu behar da, halaber, Malen Osa eta Sara Alonso euskaldunen lana, bigarren eta hirugarren postuetan sailkatu baitziren, hurrenez hurren.
Euskal Selekzioko ordezkarien artean, hainbat korrikalarik bost ordu inguruko denborak egin zituzten, maila lehiakor handia erakutsiz. Gainera, hirurentzat —Ainhoa Garikano, Sonia López eta Itsasne Urkiaga— Zegama-Aizkorriko lehen parte-hartzea izan zen.
Euskal Selekzioaren emaitzarik onena Lide Urrestarazuk lortu zuen, 12. postuan sailkatuta (4:46:33). Ainara Alcuaz 20. izan zen (5:09:32), eta haren atzetik Ainhoa Garikano 22. (5:12:50). Sonia López 24. izan zen (5:19:21), Irune Vélez de Mendizabal 25. (5:25:32) eta Itsasne Urkiagak 5:29:37ko denboran amaitu zuen lasterketa.
Oro har, aurtengo edizioak balorazio oso positiboa uzten du: maila kirolari handia, euskal korrikalari eta korrikalarien protagonismo gero eta handiagoa eta, beste behin ere, Euskal Selekzioaren ordezkaritzarekiko harrotasuna, ibilbide osoan zehar bizi izan den giro paregabearekin batera.
📷 Fotoiosu Photography
📷 Jon Etxebeste
