Elgeta, 2024ko maiatzaren 18a. Euskal Mendizale Federazioa – Euskal Mendizale Federazioak (EMF-FVM) eta Nafarroako Mendi Kirol eta Eskalada Federazioak (MEKNF-FNDME) gaur mendeurreneko ekitaldi nagusia ospatuko dugu Elgetako plazan, Gipuzkoan, aire zabalean, duela 100 urte mendizale elkartea jaio zen lekuan.
“Elgetan” izenpean, ekitaldian erakundeetako ordezkari ugari izan dira, besteak beste, Zigor Egia EMF-FVMko presidentea, Martín Montañés Nafarroako Mendi Kirol eta Eskalada Federazioko (MEKNF-FNDME) presidentea, Bingen Zupiria jarduneko Eusko Jaurlaritzako Kultura eta Hizkuntza Politikako sailburua eta Gobernuaren bozeramalea, Jose Maria Aierdi Nafarroako Gobernuko Landa Garapen eta Ingurumen kontseilaria eta Ibon Unzetabarrenetxea Elgetako Alkatea. Gainera, Iparraldeko mendizaletasunaren ordezkari gisa, Rafael Valdivielso Baionako Auñamendi Mendi Elkartearen bazkide sortzailea izan dugu.
“Legealdi hau hasi genuenean, gure helburu nagusia zen batzea eta Hego Euskal Herriko 5 federazioak soka berean egotea, soka beretik lotuta eta helburu berberekin. Hain izan da hurbiltze handia, batez ere Nafarroarekin, non gaur Elgetan aurkezten dugun Euskal Herriko Mendi Biltzarra sortu dugun. Eta aurkezpen honetarako ahalik eta leku eta datarik onenean egiten dugu, bertan dauden mendizaleen kolektiboarekin batera. Federazio ezberdina gara eta beste kirol federazio batzuek ez duten zerbait daukagu. Gutako askok kirol gisa ikusteaz gain, bizitzeko, harremanak izateko, naturarekin bat egiteko eta norbere burua gainditzeko modu gisa ikusten dugu hori” onartu du Zigor Egiak. Gainera, etorkizunean bi federazioen Batasuna bermatzearen garrantzia aldarrikatu du: “Mendi taldeak indartu behar ditugu, federazioa mendi taldeetatik sortu zan eta mendi taldeak direz eta izango direz federazio honen bizkar hezurra”.
Bestalde, Martín Montañés-ek, MEKNF-FNDMEko presidenteak, gure historia hurbileko emakumezkoen mendizale jarduera aparta nabarmendu nahi izan du. Gure mendizaletasunean ospetsuak diren hainbat emakumeri errepasoa egin ondoren, gogorarazi duenez, “ematen ditugun milaka federazio-lizentzietatik, gure bi federazioen artean ia % 40 emakumeenak dira”.
Hegoaldeko bi federazioen arteko harreman ona ere azpimarratu du: “Beti ulertu izan dugu elkar, izan ere, gaur hemen Elgetan frogatzen da,non bi federazioak elkarrekin aurkitzen garen mendeurrena ospatzen eta egunez egun lanean jarraitzeko asmo sendoarekin, gure arteko lotura are gehiago eratzeko. “.
Gure bi presidenteen hitzaldiaren ondoren, 100 urte baino gehiago dituzten klubei omenaldia egiteko unea iritsi zen: Club Deportivo Bilbao, Eibarko Klub Deportiboa, Club Deportivo Fortuna, Baskonia Mendi Taldea eta Bilbao Alpino Club
Ondoren, jarduneko Kultura eta Hizkuntza Politika sailburuak, Bingen Zupiriak, hartu du hitza. Bi federazioen mendeurrenak egungo garaietan duen garrantzia azpimarratu du, konpromisoa, lana, talde-izaera eta mendizale kultura ehun urtez mantentzea ez baita erraza. Etorkizunera begira goraipatu du bi federazioek hartutako lankidetzarako erabakia.
José Mari Aierdik, Nafarroako Gobernuko Landa Garapeneko eta Ingurumeneko kontseilariak, mendi klubek eta hauen federazioek eskaintzen diguten lezioa azpimarratu du, “beren 100 urteko historian, mendi eremura egokituz, baina baita bidean aurkitu diren era guztietako gorabehera eta abagune guztietara ere, norabidea eta iparraldea mantentzeko trebetasun handiz“. Eta mendia batzen gaituen zerbait bezala aipatu du: “mendiak ez ditu ateak, hesiak eta mugak ulertzen. Eta frogarik onena da EAEko eta Nafarroako federazioak, gaur Elgetan elkartuta, mende bateko historia komunarekin “
Erakundeetako ordezkarien hitzaldiaren ondoren, Cari Velezek, 1992tik 1996ra Nafarroako Mendizale Federazioko lehendakariak, aginte-makila eman dio Karmele Biurrun FNDMEko lehendakariordeari, emakumeek gure federazioetan izan duten garrantzia azpimarratuz. Izan ere, beti izan dira emakumeak gure mendiko kiroletan (askotan itzalean edo meritu berdineko gizon ospetsuren baten atzean), baita federazioko estamentuetan ere. Orain, ordea, ezinbestekoa da emakumeak federazioetan egotea. Ikusgarritasunari dagokionez, aurrerapauso izugarriak eman ditugu, eta, ekintza sinboliko horrekin, balioetsi nahi dugu emakumeek federazioetan betetzen duten zeregina, eta, aldi berean, dei egin nahi dugu gure klubetan erantzukizunak hartzeko eta berdintasunaren aldeko urratsak egiten jarraitzeko.
Ondoren, Euskal Herriko Mendi Biltzarra (EHMEBI) – Unión Vasconavarra de Deportes de Montaña (UVADEMO) elkartearen aurkezpena izan da, EMFren eta FNDMEren arteko elkarlanerako organo iraunkorra, nolabait, gure jatorrian eta hamarkadetan zehar mantendu genituen programa eta jardueren unitate hori jasoko duena. Hemen, honen inguruko manifestua.
Ibon Unzetabarrenetxea, Elgetako alkatea, izan da jai egunari amaiera eman diona: “Ziur nago gure arbasoek, bere garaian plaza hau bete zutenek, gaur ikusiko gaituztela edonon, harro eta pozik, euren ametsak bizirik dirauela ikustean. Urteurren hau ez da soilik gure iraganaren ospakizun bat, baizik eta kemen eta asmo berrituekin aurrera jarraitzeko motibazio bat. Jarrai dezagun gailur berriak eskalatzen, horizonte berriak esploratzen eta, batez ere, hainbeste maite ditugun mendiez uneoro gozatzen. Egun hau arrakasta eta abentura partekatuen beste mende baten hasiera izan dadila”.
Amaitzeko, ekitaldia itxi du, parte-hartzaileak Elgetako Espaloia Kafe Antzokira bideratuz. Bertan, “Gailurretan izan gaitun/Nos queremos en las cumbres” erakusketa ibiltaria dago, eta ekitaldi hori dela eta, maiatzaren 13tik maiatzaren 31ra arte bere geldialdia egingo du.
Gainera, eta oroimenerako egun baten amaiera gisa, argazki bat egin da bertaratu diren pertsona guztiekin, duela 100 urte leku honetan bertan egindakoaren antzekoa. Katea ez da eten!
Eguna txistuarekin eta txarangarekin girotu da jai giroaz gozatzeko. Amaitzeko, herri bazkaria egin da udal pilotalekuan, 500 pertsona ingururen partaidetzarekin.
EMFren jatorria, FVNA
Euskal Mendizale Federazioa Elgetan (Gipuzkoa) sortu zen 1924ko maiatzaren 18an, Arabako, Bizkaiko, Gipuzkoako eta Nafarroako Mendi Elkarteek sustatuta, Federación Vasco-Navarra de Alpinismo izenarekin.
Hirurogei klub inguruk, 2.635 mendizale berri biltzen zituztenak, bat egin zuten lehen egun hartan Antxon Bandres buru zuen talde jaioberriarekin.
Urte horretan bertan, 1924ko martxoaren 16an, Angel Sopeñak Euskadiko lehen eskalada amaitu zuen. Gailurra egin zuen Pico del Frailen.
Banantzea
1986an Autonomia Erkidegoei eskumenak transferitzeak Euskal Herriko Federaziotik banantzea ekarri zuen. Harrezkero, EMF-FVMn inplikatutako eragileek hainbat ekimen egin dituzte bateratzearen alde, hala nola Erdigune Martxa. Ekimen honek mendizale euskaldunak biltzen ditu Andia mendilerroan, San Donato baselizatik eta Lezitza tontorretik gertu.
Hala ere, gure Federazioaren lanari laguntzeko kemena aspalditik dator. Herritarren konpromisoaren adibide garbia 1967an sortutako egoera da, Andeetara egindako lehen espedizioaren ondoren. Segizioak Andeetako mendikateko tontor esanguratsuenetako batzuetan gailurra egitea lortu zuen, eta lorpen horrek hainbat eta hainbat omenaldi eta ospakizun ekarri zituen berekin, Espainiako Mendi Federazioak Pedrotxo Otegi FVNAko orduko presidentea alde bakarrez kargutik kendu aurretik, espedizioa ikurrinarekin identifikatu zuelako, Espainiako banderaren ordez. Kargugabetze horrek izugarri ahuldu zuen FVNA, bere jarduera ahalik eta adierazpide txikienera murriztuz.
Egoera horren aurrean, eta Federazioaren ibilbide osoan zehar, herritarren konpromisoa, eta bereziki bertako kluben bidez, funtsezkoa izan da FVNAren eta, ondoren, Euskadiko eta Nafarroako federazioen jarraipenerako eta bilakaerarako. Euskal Herriko tontorrak beti izan dira Federazioaren lotura geografiko eta kulturala, eta Mendeurrenak indartu egin du ekintza-batasunaren aldeko apustu hori.
Euskal Herriko Mendi Biltzarra
Bi federazioek sortutako elkartea da, lan-organo komun eta iraunkor gisa. Horretarako, irudi korporatibo bateratu bat sortu da, partekatutako agenda bilduko duen marka komertzial gisa funtzionatuko duena.
Nolabait, EHMEBIk “Mendiurrena” ren lekukoa hartuko du (gure programa bateratua Mendeurrena dela eta), hemendik sortuko baitira jarduera eta ekitaldi bateratuak eta gure ekintza-batasunerako borondatea, baita lehia-mailan ere (Euskal Herriko Kopak bezala).
Pyrenaica
Pyrenaica Euskal Mendizale Federazioaren aldizkari ofiziala da. 1926az geroztik argitaratzen da, mendizaletasunaren nazioarteko aldizkari dekanoen artean, erreferentzia gisa Alpine Journal britainiarra (1863ko munduko lehen aldizkari espezifikoa), 1895eko Planinski vestnik esloveniarra, 1907ko Canadian Alpine Journal eta Peñalara (Espainiako lehen argitalpena, 1913ko data duena) hartuz.
Hiru hilean behin argitaratzen da, mendizaleen ekarpen altruistekin. Bere tirada 32.000 ale ingurukoa da hiru hilean behin, eta gutxi gorabehera Bizkaia, Araba, Gipuzkoa eta Nafarroako 750 herritan banatzen da, baita Europa, Amerika eta Asiako 16 herrialdetan ere. Urteko lau zenbakiek 384 orrialde dituzte guztira.
2014ko azaroaren 8an, Elgóibarren egindako EMF-FVMren batzarrean, Pyrenaica aldizkaria federazioaren estatutuetan sartzea erabaki zen, federazioaren komunikazio-organo gisa eta ordezkatzen duen kultura- eta mendizaletasun-ondarea aitortzeko.
Mendeurreneko irudia
Irudi honekin bi federazio original elkartzen dituen batasuna mendizaletasuna gogorarazi nahi ditugu.
Bi zeroak elkartuta eskontza-eraztunen antza daukate. Natura-espazioak, proiektuak, txapelketak eta abar partekatzen dituzten bi banako, jaiotze- eta ospakizun-data berdinarekin.
Infinituaren sinbolo gisa ere interpreta daiteke, eta ideia hori indartu egiten dugu proposatutako ikurrarekin: betidanik eta betiko.
Azkenik, 1 zenbakiak bi federazioak elkartzen dituen elementua adierazten du: mendia.
Aldapa bat jarri dugu gailurrerantz, eta malda hori handiagoa eta altuagoa izango da beti (elkarrekin urteak betetzen jarraitzeko nahiaren sinbolo gisa).
📷 Argazki-galeria osoa: https://flic.kr/s/aHBqjBr5Ap
Laburpena 📷⏬
