Iruñeko Bihatz eskalada-guneak joan den maiatzaren 10ean hartu zituen Euskal Herriko Boulder (Bloke) Txapelketaren lehen edizioa eta Open Bihatz txapelketa. Euskal eskaladarentzat hitzordu historikoa izan zen, eta 160 parte-hartzaile baino gehiago bildu zituen, bai kategoria ofizialetan bai open formatuan.
Txapelketa Euskal Herriko Mendizaleen Biltzarraren lankidetza-hitzarmenaren barruan antolatu zuten Euskal Autonomia Erkidegoko eta Nafarroako mendizale federazioek elkarlanean, eta Iruñeko Bihatz rokodromoaren laguntza izan zuen.
Probak Euskal Herriko txapelketa ofiziala eta Open Bihatz formatua uztartu zituen, federatutako zein federatu gabeko eskalatzaileei parte hartzeko aukera emanez, baita Estatuko hainbat txokotatik etorritako kirolariei ere.
Jardunaldia zozketa bidez banatutako hiru sailkapen-txandarekin hasi zen, eta kategoria guztiek parte hartu zuten bertan. Horretarako, zailtasun progresiboko 30 bloke prestatu ziren, V+ mailatik 8A mailaraino, Gorka Karapeto, Iker Arroitajauregi eta Urko Zabala bezalako setter ezagunen eskutik.
Arratsaldean finalak jokatu ziren, IFSCren bloke bidezko errotazio eta denbora mugatuko formatu ofizialari jarraituz. Kategoria bakoitzeko zortzi kirolari onenek eskuratu zuten finalerako txartela, beteranoetan izan ezik, ez baitzen finalik jokatu. Absolutu eta U-19 kategoriek batera lehiatu zuten.
Emaitzei dagokienez, emakumezkoen maila absolutuan Inés Allende izan zen garaile, Elur Arteaga eta María Feoren aurretik. Gizonezkoetan, Eneko Carreterok eskuratu zuen txapela, Andoni Esparta bigarren izan zelarik eta Mikel Linacisorok podiuma osatu zuelarik.
19 urtez azpiko emakumezkoetan Sara San Martinek lortu zuen garaipena, Enara Malo eta Nicole Bittoikaren aurretik. Gizonezkoetan, berriz, Ander Beitia izan zen irabazlea, Haritz Urkiola eta Gorka Gardeazabal podiumean lagun izan zituela.
17 urtez azpiko emakumezkoetan Sofía Hernández nagusitu zen, Enma Hernández eta Libe Fernándezen aurretik. Gizonezkoetan, Eñaut Usonek eskuratu zuen lehen postua, Lier Perez eta Unax Rodríguez podiumean lagun zituela.
15 urtez azpiko emakumezkoetan Maddi Mendiburu izan zen garaile, Olaia Sagasti eta Ihintza Gonzalezen aurretik. Gizonezkoetan, Lur Guenetxea izan zen txapeldun, Iraultza Azkue bigarren eta Markel Korta hirugarren izan zirelarik.
Txapelketak euskal eskaladako izen nabarmenetako batzuk bildu zituen, eta agerian utzi zuen bloke modalitateak Euskal Herrian bizi duen une bikaina eta lehen edizio honek diziplina honentzako bultzada garrantzitsua ekarri du.
Sailkapenak
