Igande goizean ospatu zen Gaunan EMFren XXXIII. Umeen Martxa, Iturribero MT klubak antolatuta. Martxak herritik San Vitor ermitaraino eraman zituen parte hartzaile gazteak, Itxoganako inguruetan barrena.
Ibilbidean zehar, etorkizuneko mendizaleek gogotsu gainditu zituzten igoerako eta jaitsierako aldapak, lagunartean mendi egun ederraz gozatzeko aukera izan zuten bitartean.
Gaunara itzultzean, puzgarriak eta hamaiketakoa izan zituzten zain, giro lasaian, jaigiroan eta familia artean.
Mendizaletasunaren belaunaldi-erreleboa sustatzeko eta gure txikiei mendia hurbiltzeko beharra balioan jarri duen egun biribila izan da.
